Inicio Galicia Ángeles Vázquez destaca a progresiva internacionalización do sector do viño galego e...

Ángeles Vázquez destaca a progresiva internacionalización do sector do viño galego e a súa aposta pola calidade

0

A conselleira do Medio Rural presidiu a presentación do libro “O potencial aromático das variedades de vide cultivadas en Galicia” editado pola Xunta


A produción comercializada no exterior polas cinco denominacións de orixe vitivinícolas de Galicia (Monterrei, Ribeiro, Ribeira Sacra, Rías Baixas e Valdeorras) supera xa o 18% do total. A tendencia á internacionalización estase, ademais, incrementando, xa que hai dez anos esta porcentaxe apenas pasaba do 13%.

Así o destacou hoxe a conselleira do Medio Rural, Ángeles Vázquez, na presentación do libro “O potencial aromático das variedades de vide cultivadas en Galicia” editado polo seu departamento e que inclúe referencias históricas e técnicas sobre a produción de viño na nosa comunidade, entre elas fichas do potencial aromático das nosas castes tradicionais.

A conselleira estivo acompañada neste acto polo director da Axencia Galega da Calidade Alimentaria, Manuel Rodríguez, e pola coordinadora da publicación, Mar Vilanova. Na súa intervención, apostou por fomentar esa internacionalización do sector a través do traballo conxunto da Xunta, os consellos reguladores, os viticultores e os adegueiros e tendo sempre como bandeira a extraordinaria calidade dos viños galegos.

Obra coralEn relación co libro presentado hoxe, a titular de Medio Rural salientou que se trata dunha “obra coral”, froito do traballo conxunto dun grupo de especialistas na materia, e que ten a bondade de combinar “o seu carácter técnico e científico co de divulgación, de interese para a poboación en xeral”. Valorou tamén o recoñecemento que supuxo a mención especial outorgada pola Organización Internacional da Viña e o Viño (OIV) a esta publicación, na categoría de viticultura.

A conselleira avogou, así mesmo, por “reforzar a aplicación da investigación, o desenvolvemento e a innovación e impulsar a transferencia de coñecementos ao sector”, algo ao que contribúe, dixo, este libro. E rematou a súa intervención lembrando os principais datos deste eido produtivo, tales como os 16.000 viticultores e as 460 adegas que agrupan as denominacións de orixe galegas. 

Dejar una respuesta

Please enter your comment!
Nombre