O Goberno galego incrementa nun 5% a contía do convenio de colaboración coa federación para chegar este ano aos 23.310 euros co fin de contribuír ao seu funcionamento
O conselleiro de Política Social, José Manuel Rey Varela, salientou hoxe durante unha visita ás instalacións da Federación Galega de Enfermidades Raras e Crónicas (Fegerec) a importancia do traballo coordinado coas organizacións sociais para dar unha mellor resposta ás necesidades deste colectivo e das súas familias. Ademais, Rey Varela anunciou un incremento do 5% do convenio de colaboración que o se departamento autonómico mantén con esta federación, destinando este ano 23.310 euros co gallo de contribuír ao funcionamento da mesma.
Nesta liña, o titular de Política Social avogou por seguir impulsando o diálogo e a colaboración coas entidades porque “xuntos poderemos avanzar máis na promoción da autonomía persoal, a rehabilitación, a plena integración e na sensibilización da opinión pública”. “Catro eixos que son fundamentais para as políticas sociais da Xunta e que compartimos con Fegarec”, engadiu.
Ademais, Rey Varela recordou o compromiso unánime do Parlamento coas persoas que padecen enfermidades raras e crónicas coa aprobación o pasado mes de febreiro dunha iniciativa encamiñada a solicitar ao Goberno central que se amplíe a listaxe de enfermidades minoritarias consideradas graves e, ao mesmo tempo, que se especifiquen os criterios que definan o que se entende por coidado directo, continuo e permanente, xa que este é un aspecto básico para determinar as prestacións e axudas.
Ao respecto desta iniciativa, o conselleiro apuntou que “se trata de demandas das entidades que traballan día a día con este colectivo que a Cámara asume na procura de mellorar a calidade de vida das persoas afectadas e das súas familias”.
Fegerec está formada por diversas entidades de enfermidades raras e crónicas que representan ás persoas que padecen ataxia, lupus, fibrose quística, esclerose múltiple, esclerose lateral amiotrófica, retinose pigmentaria, linfedema, atrofia muscular, síndrome de Arnold Chiari, enfermidade de Behçet e afectados polo síndrome de West. Estas entidades levan a cabo diferentes servizos: logopedia, fisioterapia, voluntariado, orientación e asesoramento e formación.
- Te recomendamos -
