O delegado territorial de Lugo, José Manuel Balseiro, visitou a escola de equitación La Cruz, que recibiu financiamento para ampliar e mellorar as instalacións
A Consellería do Medio Rural destina 200.000 euros a impulsar sete proxectos no municipio de Taboada a través do Grupo de Desenvolvemento Rural (GDR) Miño-Ulla. O delegado territorial de Lugo, José Manuel Balseiro, visitou hoxe unha das iniciativas empresariais apoiadas por este programa, co que a Xunta “busca potenciar o desenvolvemento económico e social dos municipios rurais”, sinalou.
Balseiro desprazouse ata a escola de equitación La Cruz, que recibiu financiamento para a ampliación das instalacións, coa construción dunha nova nave, a reforma dos accesos incluída a eliminación de barreiras arquitectónicas, e o acondicionamento de dúas parcelas para zona de adestramento e zona de salto de campo. Deste xeito, esta instalación pode ampliar a oferta de servizos e acoller competicións da modalidade de concurso completo.
O delegado explicou que este é un dos cinco proxectos produtivos impulsados polo GDR no municipio na última convocatoria, que suman un volume de axudas de 128.500 euros para un investimento inducido de 289.500 euros.
Así, ademais da escola de equitación o GDR subvencionou a dúas explotacións agrarias para a introdución de medidas de eficiencia enerxética, nunha delas mediante a instalación de paneis solares e na outra de recuperadores de calor.
Igualmente, impulsou a modernización dun obradoiro de galletas artesanais situado na parroquia do Carballo, que introduciu nova maquinaria, acondicionou a zona de acceso e mellorou a eficiencia enerxética revestindo con illante os paramentos do local e incorporando un sistema de calefacción por pellets.
O último dos investimentos produtivos favoreceu a ampliación dun comercio de materiais de construción, que adquiriu unha máquina de transformación e procesado de ferro para a elaboración de ferralla, o que lle permitirá prestar un servizo adicional aos construtores e particulares da contorna.
Os GDR tamén financian proxectos non produtivos que redundan na mellora dos servizos e da calidade de vida dos veciños e veciñas do rural. En concreto, neste municipio concederon unha axuda de máis de 33.100 euros á Asociación de Veciños de Arxiz para o acondicionamento dun local social.
Nesta mesma liña, o concello de Taboada recibiu unha achega de 38.400 euros para adquirir un vehículo adaptado para persoas con mobilidade reducida, que os servizos sociais municipais porán a disposición de todos os veciños que o precisen e, en concreto, dos usuarios da residencia e o centro de día.
- Te recomendamos -