Un total de 24 concellos delegaron na Academia Galega de Seguridade Pública (AGASP) o proceso de selección de candidatos para 109 prazas de auxiliares
Os 24 concellos que delegaron na Xunta as súas competencias para acometer o proceso de selección de auxiliares de policía local xa poden contratar aos candidatos que pasaron as probas e realizaron o curso de capacitación. En total, a través desta vía cubriranse un total de 109 prazas, que foron as vacantes comunicadas polas propias entidades locais.
Durante o mes pasado, realizáronse as probas físicas e teóricas. As persoas que as superaron participaron, durante os pasados días, nun curso de carácter obrigatorio no que abordaron materias como o dereito procesual-penal, policía administrativa, ética e principios básicos de actuación, primeiros auxilios, seguridade viaria e regulación de tráfico.
Logo de rematar esta formación, os candidatos procederon entre onte e hoxe á elección de destinos, polo que os concellos xa poden proceder á súa contratación. Cómpre destacar, ademais, que hai confeccionada unha lista de reservas, polo que se poden cubrir todas as prazas aínda que haxa renuncias.
Ademais deste proceso para auxiliares, está previsto que este mesmo mes se publique a convocatoria unificada para a selección de policías locais. Neste caso, os concellos delegaron un total de 39 prazas.
Primeira convocatoria unificadaTrátase do primeiro ano no que a Academia Galega de Seguridade Pública (AGASP) centraliza estes procedemento para aqueles concellos que decidan voluntariamente delegar as súas competencias na materia. Ata o de agora, un total de 50 concellos asinaron o convenio de adhesión.
A iniciativa é froito da sinatura dun protocolo de colaboración entre a Vicepresidencia da Xunta e a Federación Galega de Municipio e Provincias (Fegamp), que se plasmou posteriormente coa publicación no DOG do decreto 115/2017, do 17 de novembro, polo que se regula a cooperación da Administración Xeral da Comunidade Autónoma cos concellos galegos na selección dos membros dos corpos de policía local, vixiantes municipais e auxiliares de policía local.
A posta en marcha deste proceso supón un importante avance que permitirá mellorar a profesionalización da Policía Local, ao tempo que facilita a xestión dos concellos, evitando cargas e posibilitando a cobertura de vacantes e a mellora dos cadros de persoal destes corpos.
- Te recomendamos -
