O delegado territorial de Lugo, José Manuel Balseiro, subliñou no Día Internacional desta enfermidade o labor que realiza o colectivo cos doentes e as súas familias na Mariña
A Consellería de Política Social colabora coa Asociación de familiares de enfermos de Alzheimer e outras enfermidades neurodexenerativas de Burela (AFAN), apoiando con 6.000 euros o desenvolvemento de xornadas divulgativas sobre estas doenzas nos centros educativos.
Na xornada en que se conmemora o Día Mundial do Alzheimer, o delegado territorial da Xunta en Lugo, José Manuel Balseiro, quixo subliñar o labor que realiza este colectivo con doentes e coas súas familias na comarca da Mariña.
A Consellería impulsa estas xornadas para “contribuír ao coñecemento das enfermidades mentais, un punto fundamental na loita para a erradicación do estigma asociado ás persoas cun trastorno mental”.
Neste sentido, considerou “moi importante que o labor de concienciación se inicie nas etapas escolares, para ir normalizando esta realidade entre as novas xeracións”.
Balseiro explicou que a Xunta ten en marcha varias liñas de traballo dentro da Estratexia Galega sobre discapacidade Horizonte 2020. Entre os obxectivos que se buscan figuran os de potenciar a autonomía persoal dos afectados, promover unha educación e aprendizaxe permanente para as persoas con discapacidade en igualdade de condicións que o resto da poboación, e potenciar o coñecemento sobre a discapacidade.
- Te recomendamos -
