O foro desenvolverase os días 19, 20 e 21 de outubro no albergue xuvenil de Gandarío, onde terán lugar diversos faladoiros e unha feira de experiencias
A Xunta de Galicia abre o prazo para a inscrición nas XII xornadas galegas de actualización de coñecementos e intercambio de experiencias Interactuando no tempo libre que se celebrarán os días 19, 20 e 21 de outubro no albergue xuvenil de Gandarío en Bergondo (A Coruña).
O obxectivo é crear un espazo de reflexión e debate entre os profesionais do sector acerca da importancia da educación non formal como acción educativa e transformadora no eido do tempo libre, a través dunha metodoloxía activa e participativa.
Os destinatarios deste foro son monitores/as e directores/as de actividades de educación no tempo libre, técnicos/as de xuventude e dinamizadores/as xuvenís, profesionais do ámbito e membros de asociacións xuvenís, grupos informais que realicen actividades de educación no tempo libre e voluntarios/as.
Interactuando no tempo libre artellarase cunha sesión inaugural que dará paso á feira de experiencias na que os asistentes poderán visitar os diferentes postos da mesma para coñecer de forma directa e próxima as iniciativas que se expoñen. Estes postos poderán ser estáticos, onde estean expostos os traballos, ou ben ser presenciais e atendidos polas persoas que expoñen, de xeito que a experiencia sexa máis interactiva e directa. Os interesados en dispor dun stand na feira, poden solicitar a súa participación enviando un correo electrónico antes do 13 de outubro con toda a información sobre o que se poderá ver no posto.
Así mesmo, como en edicións anteriores, haberá faladoiros sobre emprego, sobre a Campaña de verán da Xunta de Galicia e sobre titulacións de tempo libre. Os interesados en asistir deberán cubrir o formulario que atoparán na web de Dirección Xeral de Xuventude, Participación e Voluntariado.
- Te recomendamos -
