A Administración autonómica inviste nesta entidade 13.000 euros para a realización de actividades de inclusión social e prevención da exclusión territorial; así como diversos obradoiros dirixidos ás persoas maiores
O director xeral de Inclusión Social da Xunta de Galicia, Arturo Parrado, coñeceu hoxe de primeira man as instalacións e actividades que desenvolve a Fundación Eduardo Pondal, entidade comprometida coas persoas maiores e co rural galego.
Ao longo deste ano e coincidindo co centenario do falecemento de Eduardo Pondal, a entidade programou unha serie de actividades interxeracionais como o taller de cestería tradicional, co que colabora a Consellería de Política Social. Ademais, a Administración autonómica presta apoio económico para realizar outras actividades de inclusión social e prevención da exclusión territorial, así como obradoiros específicos para as persoas maiores. En total, a inversión ascende a 13.000 euros.
Cómpre destacar que a Fundación Eduardo Pondal ten en marcha un proxecto piloto da Universidade rural que se fomentan valores como a solidariedade e a interacción social.
Durante a visita, Arturo Parrado agradeceu o labor da entidade e destacou que “é de vital importancia para evitar a exclusión dotar ás persoas maiores do rural de instrumentos para a participación social, tal e como fai a Fundación Eduardo Pondal”.
- Te recomendamos -