O delegado territorial de Lugo, José Manuel Balseiro, sinalou que a Consellería de Medio Ambiente, Territorio e Vivenda “continúa coa senda de recuperación urbanística e social deste barrio”
A Consellería de Medio Ambiente, Territorio e Vivenda adquirirá tres novos inmobles no barrio lucense da Tinería co obxectivo de rehabilitalos. Trátase dunha actuación no marco do programa Rexurbe, a través do cal a Xunta de Galicia actúa de forma directa en conxuntos históricos degradados para rehabilitar os inmobles que merca, así como fomentar a rehabilitación por parte dos propietarios que non están interesados en vender as súas propiedades.
O delegado territorial da Xunta en Lugo, José Manuel Balseiro, visitou hoxe a zona e deu a coñecer algúns datos das actuacións previstas. En concreto, a consellería adquire dous inmobles na rúa Catedral -os números 18 e 22- e un no Carril dos Fornos.
O investimento, entre a adquisición e os traballos de rehabilitación, suporá más de 320.000 euros e dará lugar a tres vivendas que se porán no mercado a través do Instituto Galego da Vivenda e Solo (IGVS).
Balseiro sinalou que a Xunta “continúa coa senda de recuperación urbanística e social deste barrio, onde xa se levaron a cabo numerosas actuacións de rehabilitación que están levando á zona novos veciños e tamén novos establecementos comerciais”.
O delegado lembrou que o IGVS fixo unha oferta pública de adquisición de inmobles e explicou que se resolveu “coa aceptación de todas as ofertas presentadas que cumprían os requisitos establecidos na mesma”.
A partir deste momento os pasos a seguir serán a formalización da adquisición dos inmobles, a elaboración dos proxectos técnicos de rehabilitación, a licitación e adxudicación das obras e, unha vez rematadas a posta a disposición da Xunta das vivendas resultantes para incorporarse ao parque de inmobles promoción pública.
Neste barrio, o Instituto Galego da Vivenda e Solo está a rehabilitar actualmente un total de nove vivendas, cun investimento de máis de 1,3 millóns de euros.
- Te recomendamos -
