O secretario xeral de Política Lingüística presentou hoxe a nova actividade do FalaRedes, que chegará entre xullo e setembro a 15 concellos da Rede de Dinamización Lingüística
O programa de dinamización lingüística FalaRedes estrea este domingo na Laracha unha nova proposta musical que chega da man de Xoán Curiel e da banda Son+de2: A casa do terror, un espectáculo musical dirixido á cativada de 7 a 12 anos e ás súas familias, que percorrerá ata setembro 15 localidades da Rede de Dinamización Lingüística (RDL) da Xunta.“O FalaRedes 2018 continúa cunha nova proposta musical, que presentamos en exclusiva, pensada para dinamizar o uso do galego na rapazada, para ampliar a oferta de lecer na lingua propia de Galicia e tamén para apoiar e reforzar a programación de verán nos concellos adscritos á Rede”, destacou o secretario xeral de Política Lingüística, Valentín García, na rolda de prensa de presentación, na que estivo acompañado polo alcalde, José Manuel López Varela; polos músicos Xoán Curiel e Jara Ortiz; e pola concelleira de Cultura, Festas e Deportes, Patricia Bello.
A primeira das actuacións poderá gozarse, con entrada libre e de balde, o domingo ás 19:30 horas na praza do Campo da Feira de Paiosaco.
De xira por 15 concellos da RDLTras o seu éxito con Estamos no verán!!!, Xoán Curiel volve ao FalaRedes acompañado da banda Son+d2 e da bailarina Marta Alonso. O seu novo espectáculo, A casa do terror, presenta a historia dun grupo de amigos que se ve obrigado a durmir nun edificio encantado. A historia desenvólvese entre cancións, danzas, elementos teatrais ou clown e, sobre todo, con moita participación do público asistente.
Logo da primeira función na Feira das Cereixas de Paiosaco, A casa do terror chegará desde a vindeira fin de semana a Caldas de Rei, á Serra de Outes, a Ponteareas, a Melide, a Cambados, a Ames, a Castro Caldelas, a Ribadavia, a Ourense, a Narón, a Tui, á Estrada, a Moaña e a Burela. O calendario completo da xira e toda a información están xa dispoñibles no Portal da Lingua Galega e na Axenda de Cultura de Galicia.
FalaRedesFalaRedes é un programa de dinamización lingüística da Secretaría Xeral de Política Lingüística para a RDL, que conta xa con preto de 190 entidades adheridas. Neste ano 2018, FalaRedes chega á súa sétima edición cos obxectivos de ampliar a oferta de ocio na nosa lingua e dotar os concellos de actividade en galego, de promover o seu uso e valoración social e de apoiar os artistas que desenvolven a súa creatividade na lingua propia de Galicia.
Catro edicións anteriores do programa FalaRedes acolleron os espectáculos Os Bolechas na máquina do tempo, Os Bolechas e o sabichón, Os Bolechas van ás olimpíadas e De Chispa a Tatá, imos de Moraña a Zas. Toda a información sobre as actividades de FalaRedes deste ano poden verse no Portal da Lingua Galega www.lingua.gal.
- Te recomendamos -
