Esta segunda edición de formación para os motoristas tivo lugar nas últimas fins de semana de setembro en Ferrol, Santiago, Vilagarcía de Arousa e Vigo
Un total de 160 persoas participaron na segunda edición dos cursos gratuítos de condución segura de motocicletas que impulsou a Xunta o pasado mes.
Estas xornadas de formación leváronse a cabo nas últimas fins de semana en Ferrol, Santiago, Vilagarcía de Arousa e Vigo. A Consellería de Infraestruturas e Mobilidade organizou estas actividades formativas por segundo ano consecutivo co fin de fomentar entre este colectivo a importancia da seguridade viaria e contribuír a reducir o risco de accidentes.
Estas actividades están a ter unha gran acollida, polo que terán continuidade ata 2020, prevéndose impartir ao longo deste período un total 32 novos cursos de condución segura de motocicletas.
A Xunta destina a este programa preto de 100.0000 euros e conta coa colaboración da Unión de Moteros Europeos, da Fundación Pons Seguridad Vial e da Escuela Nacional de Conducción de Motocicletas (ENCM).
A seguridade viaria é unha materia estratéxica e prioritaria para o Goberno galego, e nesta liña a Consellería de Infraestruturas está a prestar especial atención aos usuarios máis vulnerables das estradas, os peóns, ciclistas e tamén o colectivo de motoristas.
Estas medidas compleméntanse con outras dirixidas tamén aos motoristas como a estratexia de eliminación dos treitos existentes de concentración de accidentes nas estradas autonómicas, nos que se vai a actuar co obxectivo de telos eliminado nesta lexislatura.
Estas accións formativas e de sensibilización forman parte do Plan de Seguridade Viaria 2016-2020, que engloba todo un conxunto de medidas e liñas de traballo coas que se busca reducir ao máximo o número de accidentes de tráfico que se rexistran nas estradas galegas e minimizar as súas consecuencias.
- Te recomendamos -