Inicio Galicia Os centros residenciais da provincia da Coruña recibiron 156 teléfonos móbiles e...

Os centros residenciais da provincia da Coruña recibiron 156 teléfonos móbiles e tablets para facilitar a comunicación durante o confinamento

0

Estes dispositivos foron cedidos por Cenor electrodomésticos, a compañía telefónica Orange, a Fundación Profuturo e La Caixa


O delegado territorial da Coruña, Ovidio Rodeiro, mantivo esta mañá un encontro coas directoras e directores de centros de atención á discapacidade e residencias de maiores da Coruña para escoitar as súas necesidades e para trasladarlles a última iniciativa levada a cabo pola Consellería de Política de Social de enviar 156 teléfonos móbiles e tablets para facilitar a comunicación dos usuarios cos seus familiares durante as medidas de confinamento que se están a producir durante a emerxencia sanitaria.

Estes dispositivos, que foron cedidos por Cenor electrodomésticos, a compañía telefónica Orange, a Fundación Profuturo e La Caixa, serven para manter o contacto entre os residentes e as súas familias.

Con esta achega procurase dar solución a unha situación que preocupaba ás persoas que viven nos centros residenciais de servizos sociais e as súas familias. Aínda que se intensificou o contacto telefónico nestes centros, decidiuse dar un paso máis e facer uso dos avances tecnolóxicos para que poida producirse tamén un contacto visual.

Ademais, esta doazón de dispositivos móbiles convértese nunha mostra máis da solidariedade que todo o tecido social galego está a amosar nesta pandemia, xa que desde o primeiro momento puxéronse en contacto coa Administración autonómica, para facer chegar a súa axuda.

Plan social de continxenciaEsta iniciativa forma parte do Plan social de continxencia no que tamén se atopan medidas como o teléfono social (900 400 800), que está á disposición das persoas que teñan dúbidas básicas, que necesiten acompañamento ou atención psicolóxica e que atendeu desde a súa posta en marcha máis de 2000 chamadas.

En segundo lugar, o seguimento telefónico aos 14.400 usuarios de centros de día e ocupacionais e, para os fogares que o necesita, o reparto de comida a domicilio, que xa chega a 250 familias máis. Un correo electrónico para a detección rápida de situacións de risco (atencionsocialemerxencia@xunta.gal).

En terceiro lugar, unha axuda económica para os nenos que dispuñan dunha bolsa de comedor da súa escola infantil, colexio ou instituto, das que se beneficiarán máis de 51.000 fogares galegos. Un Servizo de Axuda no Fogar (SAF) extraordinario para as persoas que necesiten coidados a domicilio, por un importe de 6 millóns de euros.

Ovidio Rodeiro tamén lembrou que o Goberno Galego procedeu á exención das cotas das escolas infantís, centros de día e ocupacionais con financiamento público e publicouse a maior orde de axudas da historia de Galicia destinada ás entidades de inclusión social, por un importe de 18,3 millóns de euros.

E por último, recalcou que a Xunta adiantou preto dunha semana o pagamento da Renda de inclusión social de Galicia (Risga) do mes de abril para aliviar a economía doméstica de 10.000 familias galegas. Trátase dunha medida pioneira na nosa comunidade para a que o Goberno galego destinou un investimento de 4,5 millóns de euros.

COMARCA

Dejar una respuesta

Please enter your comment!
Nombre