Inicio Galicia O programa RedMay da Xunta prestou nun mes servizos gratuítos de podoloxía,...

O programa RedMay da Xunta prestou nun mes servizos gratuítos de podoloxía, optometría e asesoramento a 348 persoas en catro concellos do rural de Lugo

0

O delegado territorial de Lugo, José Manuel Balseiro, visitou a unidade móbil no Valadouro, onde se pecha o proxecto piloto, e subliñou que a Consellería de Política Social traballa na súa continuidade e expansión


A unidade móbil do programa RedMay da Xunta de Galicia atendeu durante o mes de outubro a 348 persoas que recibiron servizos gratuítos de podoloxía, optometría e asesoramento nos concellos de Cervantes, As Nogais, Portomarín, e Abadín.

Con esta iniciativa, apoiada pola Unión Europea, a Consellería de Política Social facilita que as persoas maiores de 55 anos que viven en zonas rurais poidan beneficiarse destas prestacións sen ter que desprazarse fóra das súas localidades.

O delegado territorial da Xunta, José Manuel Balseiro, visitou hoxe a unidade móbil no Valadouro, onde mañá remata o proxecto piloto, e subliñou que a Consellería traballa na continuidade e extensión desta iniciativa que se desenvolveu nunha vintena de concellos galegos.

A unidade móbil permaneceu unha semana en cada un dos municipios visitados, á disposición dos veciños e veciñas de luns a venres en horario de mañá e tarde. Na provincia de Lugo, o 53,2% das persoas atendidas solicitaron os servizos de podoloxía, o 40,8% os de óptica, e o 6% restante realizaron consultas sobre múltiples cuestións da vida cotiá, como as relacionadas coas facturas de servizos domésticos ou a eliminación de barreiras arquitectónicas nos fogares.

En concreto, nas Nogais foron atendidas 89 persoas, 51 na especialidade de podoloxía e 38 en optometría. En Cervantes 84, delas 44 en podoloxía, 34 en óptica e 6 en consultas diversas. En Portomarín 97: 56 en podoloxía, 35 en óptica e 6 en consultas. E en Abadín 78, das cales 34 solicitaron servizos de podoloxía, 35 de óptica e 9 outro tipo de asesoramento. No Valadouro espéranse cifras similares dado que a afluencia de persoas foi constante durante toda a semana.

A Xunta desenvolve o proxecto RedMay en colaboración coa Universidade de Vigo e a Cámara Municipal de Braga, que xestiona a iniciativa na rexión Norte de Portugal.

Dejar una respuesta

Please enter your comment!
Nombre