O documento contén as liñas mestras da planificación para a completa renovación do mapa de servizos de autobús da Comunidade Autónoma cando finalicen as concesións vixentes en 2019
Santiago de Compostela, 20 de novembro de 2018.- O Consello Galego de Transportes deulle hoxe o seu visto e prace ao Plan de transporte público de Galicia, que este mesmo mes será elevado ao Consello da Xunta para a súa aprobación.
O Consello Galego de Transportes é un órgano colexiado no que están representados todos os axentes relacionados directa ou indirectamente con este sector: os distintos departamentos a Xunta de Galicia, a Administración xeral do Estado, os concellos, as deputacións provinciais, as cámaras de comercio, os colectivos de consumidores e usuarios, as forzas sindicais e as patronais dos distintos sectores do eido do transporte.
O Plan de transporte público de Galicia é o traballo de renovación completa do mapa de servizos de autobús da Comunidade Autónoma que está a elaborar a Xunta co horizonte da próxima finalización do vigor das actuais concesións, que se producirá en 2019. O documento aprobado hoxe contén as liñas mestras dese traballo.
A Consellería de Infraestruturas e Mobilidade presentou ante este foro o documento resultado do primeiro proceso de participación pública ao que foi sometido ese Plan e que incorpora, na medida do posible, as achegas formuladas ao mesmo polos diferentes concellos e entidades.
Unha vez acadado o informe favorable do Consello Galego de Transportes, a Consellería de Infraestruturas e Mobilidade elevará o Plan ao Consello da Xunta, como paso previo ao deseño dos anteproxectos das novas liñas que serán tamén sometidas a un proceso de participación pública antes da súa aprobación e licitación.
A finalidade de todo este proceso é acadar un transporte público máis útil, sostible e eficiente, capaz de responder con eficacia ás necesidades de mobilidade da Galicia do século XXI, afondando nas novas modalidades de autobús compartido e servizos baixo demanda.
O Plan contén as medidas necesarias para garantir a pervivencia do tecido empresarial galego do sector e a continuidade de todos os postos de traballo.
- Te recomendamos -