O conselleiro de Facenda pídelle á ministra de Política Territorial eliminar a taxa de reposición na sanidade e nos servizos sociais para aumentar a estabilidade no emprego

Valeriano Martínez tamén pediu restituír a xubilación parcial para o persoal de servizo público

O conselleiro de Facenda, Valeriano Martínez, mantivo hoxe unha reunión por videoconferencia coa ministra de Política Territorial e Función Pública, Carolina Darias, na que lle trasladou as demandas de Galicia no eido do emprego público. En primeiro lugar, no ámbito da estabilidade no emprego o conselleiro demandou a autorización -xa solicitada- para a eliminación das taxas de substitución no sector sanitario público co fin de consolidar o emprego destes profesionais, o que permitiría ofrecer este ano 3.500 empregos públicos nesta área.

Ademais, Valeriano Martínez tamén solicitou a ampliación desta medida a profesionais vencellados ás políticas sociais –coma o persoal en fogares de maiores, en centros de dependencia ou de discapacidade– co fin de consolidar o emprego neste ámbito, así como eliminar o requisito de antigüidade de tres anos para considerar un posto como elixible para a súa inclusión nos procesos públicos de estabilización do emprego.

No eido da xubilación parcial, o conselleiro de Facenda demandou a restitución do réxime de xubilación parcial para persoal de servizo público, que foi eliminado como consecuencia de non ser renovado polo actual goberno a principios de 2019.

Xubilación dos bombeiros forestaisDurante a reunión, o representante da Xunta tamén pediu ampliar aos bombeiros forestais e ao resto do servizo de defensa e prevención contra incendios forestais de Galicia o réxime de xubilación favorable do que xa gozan os bombeiros dependentes da administracións públicas, mediante a aplicación de coeficientes de redución á idade de xubilación. Esta medida permitiría reducir a idade de xubilación duns profesionais que realizan un traballo físico moi esixente, sometido a altas temperaturas e exposición ao fume.

Finalmente, o conselleiro de Facenda aproveitou para reiterar a solicitude de pago da mensualidade do IVE de 2017 que se lle debe a Galicia, e dos 100 millóns das políticas de emprego deste ano requisados a Galicia polo Goberno. Tamén demandou que na distribución do fondo de 16.000 millóns destinados ás comunidades autónomas para facer fronte á pandemia da covid-19, non se introduza ningún criterio de distribución innovador, de xeito que se manteñan os criterios xa empregados no sistema de financiamento autonómico.