O secretario xeral da Emigración reuniuse con Eduardo Pahíno, quen, ademais de formar parte do Consejo de Residentes Españoles, é vicepresidente dos empresarios galegos afincados no país
O secretario xeral da Emigración, Antonio Rodríguez Miranda, animou os empresarios galegos na República Dominicana a seguir a traballar na proxección internacional de Galicia a través dos diferentes sectores económicos nos que desenvolven o seu labor. O responsable autonómico mantivo un encontro co vicepresidente da Asociación de Empresarios Gallegos de la República Dominicana, Eduardo Pahíno, quen ademais é membro do Consejo de Residentes Españoles (CRE) no país centroamericano, para coñecer a situación da comunidade galega na zona.
Miranda aproveitou o encontro para afondar nas necesidades e avances que están a vivir os empresarios galegos nos distintos sectores industriais e económicos nos que desenvolven a súa actividade, e aplaudiu o forte compromiso que manteñen coa comunidade autónoma galega. O secretario xeral da Emigración trasladoulles o seu agradecemento polo importante labor de internacionalización da súa terra de orixe que levan a cabo, non só no seu país de residencia, senón en todo Centroamérica.
Máis de 2.500 galegos na parte dominicana da illa Na República Dominicana residen actualmente 2.654 galegos, segundo o último dato oficial publicado polo Instituto Galego de Estadística (INE), con data 1 de xaneiro de 2018. Do total de galegos que viven no país centroamericano a gran maioría, 2.215, é dicir, máis do 83 %, xa naceron alí, e só 439, o 16,54 %, o fixeron en Galicia.
- Te recomendamos -
