Inicio Galicia Medio Ambiente estudará colaborar co Concello do Pereiro de Aguiar nun proxecto...

Medio Ambiente estudará colaborar co Concello do Pereiro de Aguiar nun proxecto para rehabilitar tres núcleos do municipio

0
image_gallery.jpg

A conselleira Ángeles Vázquez reuniuse esta tarde co rexedor Luis Menor para analizar varios asuntos de interese municipal en materia urbanística e de reciclaxe


A Consellería de Medio Ambiente, Territorio e Vivenda analizará as posibilidades de colaborar co Concello do Pereiro de Aguiar nun proxecto municipal para acometer a rehabilitación de varios núcleos do municipio. Así o comprometeu esta tarde a conselleira Ángeles Vázquez durante unha xuntanza co alcalde Luis Menor, quen lle trasladou tamén outros asuntos de interese municipal en materia de residuos, de rehabilitación residencial e de dotación de solo industrial.

En concreto, o rexedor explicoulle que o Goberno local pretende levar a cabo a rehabilitación integral de dous núcleos históricos e un núcleo tradicional localizados no municipio, un proxecto para o que aspira a contar co apoio e a colaboración da Xunta.

Neste sentido, a conselleira lembrou que son varias as liñas de axudas para rehabilitar inmobles que o Instituto Galego da Vivenda e Solo (IGVS) pon cada ano a disposición dos concellos, e que existen figuras como as áreas de rehabilitación integral (ARI) pensadas especificamente para axudar a mobilizar fondos autonómicos e estatais para recuperar vivendas e edificios así como para acometer a urbanización das súas contornas.

Tamén en materia urbanística, o alcalde trasladoulle á conselleira os plans do consistorio para recuperar unha antiga área de esparexemento do concello ourensán co fin de revitalizala e poñela ao servizo da veciñanza, un proxecto na liña dos obxectivos que se marca o chamado Plan Hurbe da Consellería para apoiar ás entidades locais na execución de actuacións que contribúan a crear, mellorar ou humanizar espazos de uso público.

Por último, tamén acordaron estudar as posibilidades de colaboración entre ambas administracións co fin de mellorar a recollida selectiva e a reciclaxe no municipio. De feito, Luis Menor trasladoulle que está pendente da resolución da convocatoria das axudas a entidades locais para a xestión de residuos 2020-2021, solicitada neste caso a través da Deputación de Ourense para financiar a implantación dun punto limpo móbil do que se beneficiaría o seu concello.

Dejar una respuesta

Please enter your comment!
Nombre