Inicio Galicia Medio Ambiente concedeu 19 axudas para paliar os danos da vaga de...

Medio Ambiente concedeu 19 axudas para paliar os danos da vaga de lumes de 2017 sobre vivendas e construcións en Carballeda de Avia

0

A conselleira de Medio Ambiente, Territorio e Vivenda, Ángeles Vázquez, visitou esta mañá algúns dos inmobles que foron recuperados neste concello ourensán grazas á colaboración da Xunta, Cruz Vermella e varias empresas privadas

A Consellería de Medio Ambiente, Territorio e Vivenda comprometeu un total de 768.989 euros en distintos tipos de axudas dirixidas a paliar os danos que ocasionou a vaga de lumes de outubro de 2017 en vivendas habituais, enxoval doméstico e outro tipo de construcións de Carballeda de Avia, un dos municipios máis afectados por estes incendios.

En total, outorgáronse 19 subvencións, tal e como explicou a conselleira Ángeles Vázquez esta mañá no transcurso dunha visita ao Concello, durante a que puido comprobar persoalmente o resultado dalgunha das actuacións executadas con cargo a estas axudas. Neste sentido, a responsable galega de Medio Ambiente salientou o esforzo realizado polo conxunto do Goberno autonómico para atender ás vítimas e contribuír economicamente á reparación dos desperfectos.

Polo que respecta ás axudas ofrecidas pola Consellería de Medio Ambiente, Territorio e Vivenda, explicou que a dotación total do programa foi de 3,9 millóns de euros, dos cales preto de 770.000 –é dicir, a quinta parte de todo o orzamento- foron a parar a afectados de Carballeda de Avia, un dos concellos ourensáns nos que o lume causou máis danos.

Concretamente, Vázquez Mejuto indicou que catro das 19 subvencións outorgadas a afectados deste municipio destináronse a pagar obras en vivendas habituais que resultaron danadas, outras sete a cubrir os custos das intervencións sobre construcións anexas, instalacións complementarias e elementos comúns en vivendas ocasionais e a maioría, oito, a paliar os danos producidos nas casas e no enxoval doméstico.

Grazas a estas axudas e tamén á colaboración de entidades sociais e empresas que se mobilizaron a raíz da vaga de lumes, a conselleira lembrou que parte das perdas producidas en Carballeda puideron ser compensadas e dous anos despois, retomouse a normalidade. Así, agradeceu en particular a Cruz Vermella e a Ikea, presentes no acto, o seu compromiso e a axuda nos labores de recuperación dos edificios danados neste concello.

Cómpre lembrar que a vaga de lumes do outono de 2017 tivo unha incidencia especial na provincia de Ourense, onde moitas vivendas e inmobles resultaron afectados. En resposta a esta situación, o Consello da Xunta aprobou un decreto de medidas urxentes de axuda para facilitar a reparación dos danos causados polos incendios e atender as necesidades da poboación afectada nos territorios máis danados. A orde na que se aglutinaron as distintas liñas de subvención contou cunha dotación total de máis de 13 millóns de euros.

Dejar una respuesta

Please enter your comment!
Nombre