Inicio Galicia Máis de 62.000 pacientes benefícianse do sistema de garantías de tempos máximos...

Máis de 62.000 pacientes benefícianse do sistema de garantías de tempos máximos de acceso ás prestacións sanitarias

0

Tal e como remarcou o conselleiro de Sanidade, Jesús Vázquez Almuiña, “temos unha sanidade na que o paciente é o destinatario de todas e cada unha das medidas e avances que permiten mellorar a súa calidade de vida”


Dende o 10 de xaneiro do pasado ano, e ata o 31 de maio do actual, un total de 62.116 pacientes téñense beneficiado da posta en marcha do Decreto 105/2017, de 28 de setembro, que regula o sistema de garantía de tempos máximos de acceso ás prestacións sanitarias públicas na nosa Comunidade. Así o sinalou o conselleiro de Sanidade, Jesús Vázquez Almuiña, no Parlamento de Galicia, en resposta a un dos grupos da Cámara.

Deses máis de 62.000 pacientes aos que hoxe fixo referencia o conselleiro Almuiña, 15.667 foron por intervencións cirúrxicas de diagnósticos garantidos, 23.435 por consultas de vías rápidas de cancro, e 23.014 por probas diagnósticas de vías rápidas de cancro.

O máximo responsable da sanidade pública galega lembrou que o decreto que regula o sistema de garantía de tempos máximos garante un prazo máximo de espera de 60 días naturais para as intervencións cirúrxicas programadas e non urxentes, 45 dias para as primeiras consultas e 45 para as primeiras probas diagnósticas.

Tal e como destacou o conselleiro, é importante sinalar que, cando dende o Sergas non se lle poida ofrecer ao cidadán a atención no tempo máximo establecido, este poderá optar por continuar na lista de espera no centro que lle corresponda ou requirir a atención garantida noutro centro acreditado da Comunidade Autónoma, ben nun centro público doutra área sanitaria, ben nun centro concertado. Nestes casos, o Sergas asumirá directamente o pagamento dos gastos derivados da intervención.

Segundo lembrou Almuiña, o antedito decreto completa o desenvolvemento da Lei 12/2013, de 9 de decembro, de garantías de prestacións sanitarias e súmase aos decretos que regulan o dereito á segunda opinión médica e a libre elección de profesionais e centro hospitalario, e ao que regula o Rexistro galego de instruccións previas.

No que atinxe á segunda opinión médica, dende a entrada en vigor da norma en maio de 2015, e ata decembro do pasado ano, estimáronse, -dixo Almuiña-, 1.379 solicitudes. No que respecta á libre elección de profesionais, xa se atenderon, ata decembro do pasado ano, 398.917 solicitudes, sendo as máis numerosas as de médico de familia e persoal de enfermería de atención primaria. Por último, 8.315 persoas exerceron, ata decembro de 2018, o seu dereito a manifestar as instrucións previas.

Almuiña incidiu tamén, na súa intervención, en que “temos unha sanidade na que o paciente é o destinatario de todas e cada unha das medidas e avances que permiten mellorar a súa calidade de vida”.

Dejar una respuesta

Please enter your comment!
Nombre