Inicio Galicia José González destaca a importancia do sector vitivinícola como un dos motores...

José González destaca a importancia do sector vitivinícola como un dos motores de progreso, cohesión e futuro de Galicia

0

Sinalou que o viño é o principal elemento dinamizador dos territorios que conforman os distintos selos de calidade deste eido produtivo e que é preciso unir sinerxías con outros sectores como poden ser o turístico

O conselleiro do Medio Rural, José González, participou esta mañá en Monforte de Lemos na clausura da XXIV asemblea xeral da Conferencia Española de Consejos Reguladores Vitivinícolas (CECRV), onde destacou que o viño é un dos motores de progreso, cohesión e futuro na nosa comunidade, de aí o seu peso na nosa economía, cultura e tradición.

Neste senso, José González sinalou que o viño é o principal elemento dinamizador dos territorios que conforman os distintos selos de calidade deste eido produtivo. De aí a importancia de aproveitar e unir sinerxías con outros sectores como poden ser o turístico, tanto na vertente natural coma cultural ou paisaxística.

Así, o conselleiro puxo en valor as rutas dos viños, que conxugan todos estes valores e potencian a imaxe de Galicia Calidade, e sen esquecerse da coñecida “viticultura heroica” da zona da Ribeira Sacra. Un área que destaca polos seus antigos viñedos colgados en ladeiras de ata 85 graos de inclinación. Tamén aludiu á Estratexia de dinamización económica, territorial e turística das comarcas vitivinícolas de Galicia, coa que se persegue mellorar o posicionamento dos viños galegos no seu conxunto, reforzar a súa imaxe de marca e identidade vinculada aos diversos territorios nos que se producen e mellorar a eficacia da promoción e comercialización en conxunto de produtos turísticos vinculados ao sector vitivinícola.

Durante a súa intervención, o conselleiro destacou a calidade das cinco denominacións de orixe vinícolas que hai na nosa comunidade -Rías Baixas, Ribeira Sacra, Monterrei, Valdeorras e Ribeiro-, das catro indicacións xeográficas protexidas que conforman os Viños da Terra -Barbanza e Iria, Betanzos, Val do Miño-Ourense e Ribeiras do Morrazo- e a que agrupa ás augardentes e licores tradicionais de Galicia. “Cada unha delas é única”, matizou o titular de Medio Rural, subliñando que os seus aromas, corpos e variedades fan dos nosos caldos unha experiencia inigualable e converten este sector nun dos máis estratéxicos da economía galega.

Nesta liña, o conselleiro quixo agradecer o bo facer dos case 14.000 viticultores e 450 adegas que están inscritas na nosa comunidade. O titular de Medio Rural engadiu que as máis de 9.000 hectáreas de viñedo permiten producir máis de 60 millóns de quilos de uva de gran calidade, que se ve reflectido no prestixio que teñen os viños galegos con selo de calidade.

Asociación sen ánimo de lucroA Conferencia Española de Consejos Reguladores Vitivinícolas (CECRV) é unha asociación sen ánimo de lucro que representa ás denominacións de orixe vitivinícolas españolas ante o Goberno do noso país e ante organismos ou entidades públicos ou privados, internacionais, nacionais ou rexionais cuxa actividade ou competencias estean relacionadas de maneira directa ou indirecta co mundo do viño. Na actualidade integra a 54 denominacións de orixe das 70 que existen hoxe en día en España.

Dejar una respuesta

Please enter your comment!
Nombre