Inicio Galicia Feijóo salienta que a aposta en servizos, equipamentos e infraestruturas é unha...

Feijóo salienta que a aposta en servizos, equipamentos e infraestruturas é unha constante nos hospitais comarcais, que creceron en case 14.000 metros cadrados desde 2009

0
image_gallery.jpg

Anuncia a licitación do proxecto da Fase 2 en canto entren en vigor os orzamentos de 2021, para así poder iniciar a obra en canto o proxecto estea entregado ao Sergas


O presidente da Xunta, Alberto Núñez Feijóo, destacou hoxe que a aposta en servizos, equipamentos e infraestruturas é unha constante nos hospitais comarcais que, na última década, creceron en case 14.000 metros cadrados.

Durante unha visita ao desenvolvemento das obras de ampliación do Hospital da Mariña, acompañado polo conselleiro de Sanidade, Julio García Comesaña, Feijóo aseverou que a renovación integral do Servizo Galego de Saúde será unha prioridade absoluta nesta lexislatura. E, ao respecto anunciou a licitación do proxecto da Fase 2 en canto entren en vigor os orzamentos de 2021, para así poder iniciar a obra en canto o proxecto estea entregado ao Sergas.

O responsable do Goberno galego precisou que, cunha achega de 15 millóns de euros, a Fase 2 permitirá a construción dun novo edificio anexo de 2 plantas, cunha superficie suficiente para albergar: o servizo de mantemento, a unidade de prevención de riscos laborais e o salón de actos e dependencias de docencia.

Por outra banda, levarase a cabo tamén a reforma doutras áreas do edificio actual, como as de pediatría e críticos, a área policlínica e consultas externas, saúde mental ou rehabilitación.“A reforma do Hospital da Mariña está en plena faena”, dixo, lembrando que a Fase 1, cun investimento total de máis de 13 millóns, xa está rematada. Así, desde 2018, o Hospital conta cun novo edificio anexo ao edificio actual, no que se trasladaron o hospital de día, diversas consultas externas, a zona de hospitalización e a farmacia; ademais dun novo edificio de aparcadoiro de dúas alturas, cun heliporto na súa cuberta.

Así mesmo, na segunda parte da Fase 1: finalizouse a renovación de máis de 1.000 metros cadrados de hospitalización, que posibilita acoller 28 habitacións individuais e incrementar a capacidade de hospitalización un 11,5%; na planta baixa actuouse na área de diálise, extracción e administración; e levouse a cabo a mellora da iluminación e de envolventes térmicas.“En definitiva, con esta Fase 1 rematada, o Hospital conta xa con preto de 9.500 metros cadrados máis de superficie a pleno rendemento, un 54% máis do que xa tiña”, dixo, referíndose, dentro do investimento total de máis de 13 millóns de euros á achega de preto de 2 millóns de euros para a adquisición de equipamento de diagnóstico e tratamento.

Feijóo concluíu destacando que os veciños da Mariña que dependen deste Hospital están vendo como se está facendo realidade practicamente un novo complexo: “Con 28 camas máis que en 2009, aténdense 6.000 consultas máis nun ano que entón, realízanse 260 intervencións cirúrxicas máis e o tempo de espera cirúrxica baixou a 43 días”, explicou.

Dejar una respuesta

Please enter your comment!
Nombre