A conselleira de Medio Ambiente defende no Parlamento que a comunidade conta cun amplo marco lexislativo e cos instrumentos administrativos axeitados para avaliar o impacto deste tipo de proxectos e decidir sobre a súa autorización
A Xunta garante que ningún proxecto para instalar novas plantas de residuos en Galicia sairá adiante se non cumpre estritamente coas máximas garantías ambientais esixidas pola normativa en vigor. Así o asegurou esta mañá no Parlamento a conselleira de Medio Ambiente, Territorio e Vivenda, Ángeles Vázquez, quen subliñou que Galicia conta á hora de tramitar este tipo de proxectos cunha dobre garantía: unha ampla lexislación urbanística e sectorial e os instrumentos de tramitación máis axeitados para detectar posibles impactos medioambientais.
Este respaldo permítelle á Consellería de Medio Ambiente, tal e como explicou Vázquez Mejuto, decidir con plenas garantías se determinadas propostas empresariais “poden saír adiante ou non”. E por este motivo, asegurou que o seu departamento nunca autorizará a instalación dunha nova planta de residuos ou calquera outro proxecto sometido a tramitación ambiental se hai “o máis mínimo incumprimento ou irregularidade”.
Así, Vázquez Mejuto explicou que a Lei do Solo (tanto a actual como a do ano 2002) establece que o solo rústico, sempre que non sexa de especial protección, pode acoller instalacións de tratamento de residuos ao considerarse que é a localización máis axeitada para este tipo de actividades. En todo caso, lembrou que os órganos competentes, a través das normativas sectoriais, poden establecer outras limitacións no que respecta á distancia esixible entre estas plantas e asentamentos poboacionais ou grupos de vivendas.
Tamén o Plan de Xestión de Residuos Industriais de Galicia (PRIGA) define e concreta a folla de ruta a seguir por parte das empresas interesadas en proxectar e xestionar novas actividades de xestión de residuos industriais. Neste sentido, Ángeles Vázquez explicou que nel se recollen criterios técnicos, ambientais e sociais sobre a localización de futuras plantas, sempre en consonancia cos “instrumentos de planificación do territorio”.
En todo caso, a conselleira incidiu en que a obriga do seu departamento, como máxima autoridade ambiental en Galicia, é tramitar calquera iniciativa privada que propoña a instalación dunha planta deste tipo “respectando e garantindo a máxima protección” para o medio ambiente e para os veciños. Por iso, engadiu que será durante a tramitación e tras analizar con rigor técnico o proxecto, cando a consellería decidirá non autorizar a proposta se constata que non cumpre con todas as garantías medioambientais que esixe a lei.
Os casos de Teo e SantiagoA modo de exemplo, a conselleira referiuse ao proxecto para a instalación dunha planta de tratamento de residuos no municipio coruñés de Teo, unha iniciativa empresarial cuxa tramitación foi paralizada o pasado mes de setembro pola Xunta en aplicación, precisamente, da normativa en materia de urbanismo e de residuos vixente na comunidade.
Así, Ángeles Vázquez lembrou que foi o informe negativo emitido polo Concello de Teo con relación á compatibilidade urbanística do proxecto o que motivou o arquivo do expediente. Este feito, recalcou, “pon de manifesto que a normativa actual e o planeamento urbanístico son máis que suficientes para evitar a instalación” dunha planta de residuos.
Neste sentido, a titular de Medio Ambiente considerou innecesario impulsar unha modificación lexislativa co fin de tentar resolver problemas puntuais coma este e trasladar novas responsabilidades aos concellos. O papel municipal, insistiu, debe ser velar polo cumprimento da normativa ambiental e urbanística e utilizar os argumentos recollidos na mesma para poñer obxeccións a determinados proxectos industriais se consideran contraproducente para o concello a súa implantación.
Na mesma liña, a conselleira referiuse tamén ao vertedoiro de Grixoa, no Concello de Santiago, e tras recoñecer a preocupación do Goberno galego pola situación actual desta instalación, anunciou que desde o seu departamento se están a facer os estudos pertinentes aos efectos de valorar a posibilidade de establecer unhas condicións técnicas máis restritivas para o vertedoiro.
- Te recomendamos -
