O delegado territorial en Lugo, José Manuel Balseiro e o alcalde da localidade, Javier Jorge Castiñeira, comprobaron o resultado dos traballos executados durante o verán para evitar interferir na actividade ordinaria do centro
A Consellería de Cultura, Educación e Ordenación Universitaria vén de rematar as obras de mellora da cuberta do pavillón polideportivo do CEIP O Cantel emprazado no concello de Foz.
O delegado territorial da Xunta en Lugo, José Manuel Balseiro, acompañado do alcalde da localidade, Javier Jorge Castiñeira, visitou as instalacións para comprobar o resultado destes traballos executados nas pasadas semanas, para evitar interferir na actividade ordinaria do centro.
A administración autonómica destinou para este fin preto de 52.000 euros que permitiron a substitución dos translúcidos da cuberta por uns novos, a instalación de chapa prelacada así como a incorporación dun illamento intermedio con manta de fibra de vidro. Tamén se acometeu a substitución do canlón.
Balseiro explicou que coa mellora da cuberta deste pavillón a Xunta dá resposta a unha petición formulada polos representantes de nais e pais no Consello Escolar do centro e polo propio Concello.
O obxectivo final é que o conxunto das instalacións do colexio estean en perfecto estado de revista de cara o próximo curso escolar, incluídas as infraestruturas complementarias, como é esta pista polideportiva que se emprega en moitas ocasións polo alumando do centro.
Este colexia conta cunha matrícula de 187 alumnos que cursan Educación Infantil e Educación Primaria e un cadro de persoal de 17 mestres. Como novidade, o próximo curso contará cun especialista en audición e linguaxe a tempo completo.
- Te recomendamos -