Inicio Galicia A Xunta recibe ofertas de 17 empresas para executar a nova senda...

A Xunta recibe ofertas de 17 empresas para executar a nova senda na estrada AC-133 entre Franza e Rilo, no concello de Mugardos, que suporá un investimento de 500.000 euros

0

A Consellería de Infraestruturas e Mobilidade prevé a convocatoria dos actos expropiatorios neste primeiro trimestre co obxectivo de executar a obra este ano

A Xunta recibiu ofertas dun total de 17 empresas para executar as obras da nova senda peonil e ciclista na estrada AC-133, entre Franza e Rilo, no concello de Mugardos, que foi licitada por preto de 470.000 euros.

O orzamento estimado polo Goberno galego para esta intervención ascende aos 500.000 euros, incluíndo os máis de 33.000 euros do pagamento das expropiacións dos 33 predios necesarios para a actuación.

A Consellería de Infraestruturas e Mobilidade prevé a convocatoria dos actos expropiatorios neste primeiro trimestre, co obxectivo de executar a actuación este ano.

O proxecto ten como finalidade a execución dunha senda compartida, para uso de ciclistas non deportivos e peóns, paralela á estrada autonómica que comunica Fene e Mugardos.

A intervención proxectada inclúe actuacións en dous treitos da vía autonómica: o primeiro executarase pola marxe dereita, comezando na glorieta de conexión entre a AC-113 e a vía de alta capacidade V.

G.-1.2, no entorno do núcleo de Franza, finalizando no núcleo de Rilo.

No segundo treito, actuarase na marxe esquerda da estrada, do punto quilométrico 9+820 ao 9+910, para executar un itinerario polo trazado da cuneta transitable existente na actualidade, que dispón dun ancho insuficiente para a circulación peonil. Esta actuación incorpora suxestións presentadas ao proxecto inicial, como a prolongación dos itinerarios peonís ata entroncar co itinerario de peóns actual, no entorno da glorieta do punto quilométrico 8+550, dispoñendo novos pasos de peóns con sinalización.

As obras tamén inclúen a reforma da pendente lonxitudinal da senda á altura do punto quilométrico 7+760, coa fin de que teña unha pendente máxima do 6%. Tamén se prevé a reposición dun treito de colector de saneamento na zona de execución dun novo muro, entre os puntos quilométricos 9+820 e 9+910.

Este novo itinerario completa o Plan de Sendas de Galicia na comarca de Ferrol, co que a Xunta promove a construción de itinerarios seguros, sustentables e integrados na paisaxe. A execución destas actuacións está cofinanciada con fondos FEDER 2014/2020.

En total, o Plan de Sendas na comarca de Ferrol permitirá habilitar 10,7 quilómetros de novos itinerarios seguros para peóns e ciclistas non deportivos en estradas de titularidade da Xunta de Galicia, cun investimento de case 3,5 M€.

Dejar una respuesta

Please enter your comment!
Nombre