Inicio Galicia A Xunta organiza en Vilalba e Monforte de Lemos senllos cursos sobre...

A Xunta organiza en Vilalba e Monforte de Lemos senllos cursos sobre a prevención de ataques de lobo á gandaría

0

Na Oficina Agraria Comarcal vilalbesa levarase a cabo unha xornada o día 24, mentres no Centro de Formación e Experimentación Agroforestal de Monforte a acción prolongarase do 28 ao 30 de setembro

A Consellería do Medio Rural, a través da Axencia Galega da Calidade Alimentaria (Agacal), levará a cabo senllos cursos sobre a prevención de ataques de lobo á gandaría nos concellos lucenses de Vilalba e Monforte de Lemos. O primeiro será unha xornada que se impartirá o 24 de setembro na Oficina Agraria Comarcal (OAC) vilalbesa, mentres no Centro de Formación e Experimentación Agroforestal (CFEA) de Monforte a acción prolongarase tres días, en concreto, do 28 ao 30 de setembro.

Así, os asistentes ao curso da OAC de Vilalba recibirán formación nun único día, en horario de mañá e tarde. Para comezar, coñecerán a bioloxía e ecoloxía do lobo ibérico, a situación do lobo en Galicia e o seu impacto sobre a cabana gandeira, así como os métodos de prevención dos ataques tendo en consideración o manexo de mastíns como ferramenta de protección. Xa pola tarde, visitarán unha ou dúas explotacións da zona para analizar in situ que medidas se poden adoptar en cada caso.

Canto ao curso de tres días do CFEA de Monforte, a primeira xornada dedicarase aos contidos teóricos básicos e a segunda a realizar unha análise estratéxica das explotacións para deseñar plans de prevención personalizados, ao tempo que se avaliará como se trata a prevención dos ataques do lobo noutros países ou rexións. A visita de campo, a tres ou catro explotacións da zona neste caso, terá lugar o terceiro día.

Estes cursos están integrado no Plan de formación ao agro galego 2020, cuxo principal obxectivo é impulsar o desenvolvemento de actividades formativas, de demostración e información que leva a cabo a Consellería do Medio Rural. Con estas accións, preténdese contribuír a que os coñecementos cheguen aos seus últimos destinatarios: agricultores, gandeiros, silvicultores ou representantes da industria agroalimentaria.

Polo tanto, trátase de mellorar a capacitación dos traballadores dos sectores agrario, agroalimentario e forestal en todo o relacionado cos aspectos técnicos e económicos das súas actividades incidindo, cando sexa preciso, na reordenación das producións e no emprego dos métodos produtivos respectuosos coa conservación e na protección do medio.

Dejar una respuesta

Please enter your comment!
Nombre