Inicio Galicia A Xunta licita por 270.000? a restauración da igrexa de San Vicenzo...

A Xunta licita por 270.000? a restauración da igrexa de San Vicenzo de Pombeiro, unha das xoias do románico en Galicia

0

O templo, declarado Ben de Interese Cultural, ten as súas orixes na Alta Idade Media e está considerado un dos mosteiros máis relevantes da Ribeira Sacra


A Xunta vén de licitar por 270.000 euros a realización de actuacións de conservación e mantemento na igrexa de San Vicenzo de Pombeiro, en Pantón. O templo, declarado Ben de Interese Cultural (BIC), é un dos mosteiros máis relevantes da Ribeira Sacra na época medieval e está considerado como unha das xoias do románico en Galicia.

Segundo a contratación publicada hoxe, as actuacións que se levarán a cabo no templo permitirán reducir a presenza de humidades e a entrada de auga a través da cuberta, así como mellorar a carpintería das ventás, o estado das fachadas así como a sancristía ou o acceso a través do adro. Así pois, entre as actuacións que se levarán a cabo destaca a substitución da actual cuberta, a eliminación de humidades nas bases dos muros ou a execución de novas carpinterías nas fiestras que garantan a ventilación.

Do mesmo xeito, renovaranse os rexuntados das fachadas exteriores, reordenarase o espazo da sancristía substituíndo a porta de entrada e peche e renovarase a pavimentación do espazo do adro para facilitar o acceso. O prazo de execución dos traballos será de seis meses desde o inicio das actuacións.

Retablos de comezos do século XVIIIA igrexa de San Vicenzo de Pombeiro, ao igual que outros mosteiros da zona, tivo as súas orixes na Alta Idade Media, cando os anacoretas poboaron as terras da Ribeira Sacra. En concreto, data do último terzo do século XII e da primeira metade do século XIII. Conta cunha planta basilical de tres naves e cabeceira tripla. De fábrica románica conserva a cabeceira e parte dos muros perimetrais das naves, tanto ao interior como ao exterior.

No seu interior atesoura elementos moi destacados, como o conxunto de retablos, especialmente o maior, de principios do século XVIII, vinculado ao obradoiro de Francisco Castro Canseco, e o ciclo de pinturas murais que se descubriron no 1996, que foron restauradas pola Xunta a través da dirección xeral de Patrimonio cultural e que representan a Santa Cea, as lamentacións sobre o cristo morto, o xuízo final así como outras escenas como o nacemento de cristo ou Santa Ana.

Outras accións na Ribeira SacraA intervención súmase a outras previstas polo Goberno galego e centradas na mellora da conservación e rehabilitación do patrimonio cultural Ribeira Sacra. En concreto, a pasada semana o Goberno galego iniciou a tramitación administrativa para contratar as novas obras de restauración da igrexa de Santo Estevo de Atán, tamén no concello de Pantón, por máis de 40.000 euros. Trátase dun templo declarado Ben de Interese Cultural no que se levarán a cabo actuacións que permitirán mellorar a contorna, o adro e as pinturas deste sobranceiro templo románico.

Dejar una respuesta

Please enter your comment!
Nombre