Inicio Galicia A Xunta licita por 1,2 millóns o novo Plan de aforos, máis...

A Xunta licita por 1,2 millóns o novo Plan de aforos, máis moderno e intelixente, que ofrecerá unha radiografía dos 5.500 quilómetros de estradas autonómicas nos vindeiros tres anos

0

Empregarase drons, datos de telefonía ou big data para obter máis información e con maior rapidez de cara a poder adoptar as mellores decisións

A Xunta publica hoxe, na Plataforma de contratos públicos de Galicia, o novo contrato de servizos do Plan de aforos das estradas de titularidade autonómica, que permitirá ofrecer unha radiografía completa e un coñecemento máis moderno e intelixente, co emprego de novas tecnoloxías, dos máis de 5.500 quilómetros de vías que compoñen a rede de de titularidade da Xunta durante os próximos tres anos. A conselleira de Infraestruturas e Mobilidade, Ethel Vázquez, e o director da Axencia Galega de Infraestruturas, Francisco Menéndez, explicaron en rolda de prensa o novo prego de servizos licitado hoxe, ao que as empresas interesadas poderán presentar as súas ofertas ata o vindeiro 28 de xullo. O novo contrato comezará a súa vixencia a partir do 1 de xaneiro de 2021, por un período inicial de 3 anos, que poderá ser prorrogado outros dous anos máis, elevándose neste caso o investimento ata os 2 millóns de euros. O novo Plan de Aforos permitirá ofrecer un coñecemento moderno, preciso e detallado sobre o tráfico que soportan as vías autonómicas para poder planificar e explotar acertadamente a rede viaria autonómica e racionalizar os investimentos. Segundo explicou Ethel Vázquez, o Plan de aforos permite obter unha información valiosa para poder anticipar e planificar posibles melloras e investimentos, por exemplo, saber se é preciso realizar unha mellora nunha estrada, cando é necesaria unha ampliación de capacidade porque se rexistran circulacións moi elevadas ou se se é oportuno construír vías alternativas. Ademais, permite recompilar e analizar os accidentes que rexistra a rede autonómica de estradas para, a partir de aí, adoptar e planificar as medidas oportunas identificando, por exemplo, os treitos de concentración de accidentes existentes. O novo prego de servizos implicará o mantemento e explotación, durante os vindeiros tres anos, das 372 estacións de aforo fixas e móbiles existentes nas estradas autonómicas. Tamén prevé a realización dun estudo de tráfico, coa correspondente edición da memoria anual de tráfico, ademais dunha memoria de seguridade viaria e dun estudo de accidentalidade. Como principais novidades o Plan de Aforos licitado hoxe recolle novos instrumentos como a medición dos aforos nas sendas peonís e ciclistas, datos que permitirán contrastar os tráficos que rexistran estes itinerarios, en época de verán, cando son máis empregadas, ou no inverno. Este novo instrumento xa se veu probando en sendas como a PO-308 en Portonovo, ou na estrada PO-552, moi frecuentada por ciclistas. Novas ferramentas tecnolóxicas Tamén se incorporarán ás estacións de aforo novas ferramentas tecnolóxicas que permitirán automatizar o envío de información, permitindo dispoñer dos datos en tempo real, incorporando a telexestión. Ademais, buscarase unha reconstrución de datos máis achegada á realidade nas vías nas que non se realizan aforos permanentes, coa adquisición de datos de posicionamento de teléfonos móbiles anonimizados, que se analizarán con tecnoloxía big data. A través destes datos obterase información valiosa para a seguridade viaria e para a elaboración de mapas de velocidades, nos que se recolla a velocidade real en determinados puntos das estradas. A titular de Infraestruturas e Mobilidade destacou o uso das novas ferramentas tecnolóxicas, como os drons, os datos de telefonía ou o big data, para obter máis información e con maior rapidez de cara a poder adoptar as mellores decisións. Os datos de tráfico indican que a rede de estradas de titularidade da Xunta rexistrou en 2019 un incremento anual do 2,6% en canto a quilómetros anuais percorridos polos vehículos. Ademais, as vías de altas prestacións de titularidade autonómicas veñen rexistrando un incremento significativo desde o ano 2015, ao asumir case o 45% dos vehículos/km cando tan só supoñen un 9% da lonxitude total da rede autonómica de estradas.  

Dejar una respuesta

Please enter your comment!
Nombre