A conselleira de Medio Ambiente, Territorio e Vivenda traslada ao sector a necesidade de conseguir un equilibrio entre as emisións e absorcións de gases de efecto invernadoiro derivadas da acción humana
A conselleira de Medio Ambiente, Territorio e Vivenda, Ángeles Vázquez, trasladou ao sector da pesca a súa invitación para sumar na senda de acadar a neutralidade climática en Galicia, é dicir, conseguir un equilibrio entre as emisións e absorcións de gases de efecto invernadoiro derivadas da actividade humana. Un obxectivo que ten que ser unha realidade no ano 2050 e polo tanto que implica sentar as bases da Galicia que queremos deixar como legado ás xeracións futuras, alegou.
Este foi un dos retos que lanzou esta mañá durante a clausura do VI Congreso de Sostibilidade Social e Económica do Sector Pesqueiro, organizado pola Fundación Rendemento Económico Mínimo Sostible e Social, onde destacou a necesidade de facer de Galicia unha rexión resilente ao cambio climático e recordou que o Goberno galego está a traballar nese sentido; polo que a súa acción se condensará na Estratexia de cambio Climático e Enerxía 2050, que se está a ultimar e na que o sector mariño e da pesca foi un ámbito de análise en detalle.
A conselleira defendeu a necesidade de garantir a sostibilidade dos recursos e loitar contra os principais perigos aos que se enfronta, entre eles a contaminación e a incidencia do cambio climático; e que non son alleos aos sector pesqueiro.
Nese sentido, recordou que a Axenda 2030 da Organización das Nacións Unidas para o Desenvolvemento Sostible é outra folla de ruta con obxectivos moi concretos e metas que abarcan a esfera económica, social e ambiental.
A modo de exemplo, citou que unha pesca sostible é capaz de dar resposta ao obxectivo de mitigar a pobreza, creando oportunidades de emprego en especial en zonas rurais; e de crear traballo digno, poñendo en valor as técnicas artesanais; tamén suma ao obxectivo “fame cero”, evitando o esgotamento das reservas de peixe e garantindo unha fonte de alimento; contribuíndo ao mesmo tempo á saúde e benestar dos océanos, que entroncando co anterior son necesarios para que a pesca e a alimentación tamén o sexan.Ángeles Vázquez salientou que un factor determinante nesta loita é educación, polo que se debe concienciar á poboación sobre a importancia da sostibilidade da pesca e de que o consumo que fagan aposte por este tipo de técnicas.
- Te recomendamos -
