Inicio Galicia A Xunta destina axudas por importe de 760.000 euros a impulsar recursos...

A Xunta destina axudas por importe de 760.000 euros a impulsar recursos turísticos no rural da provincia de Lugo

0

O delegado territorial da Xunta en Lugo, José Manuel Balseiro, explicou que se trata dun programa de colaboración coa administración local e que o Goberno galego achega o 65% do investimento


A Consellería de Cultura e Turismo vén de resolver as axudas para entidades locais dirixidas a impulsar as infraestruturas turísticas no rural, que na provincia de Lugo suman un importe global de 760.000 euros para desenvolver 33 actuacións.

O delegado territorial da Xunta, José Manuel Balseiro, explicou hoxe que este programa apoia actuacións de recuperación e sinalización de recursos turísticos e de mellora da accesibilidade, co obxectivo de potenciar o turismo como factor de crecemento económico do rural galego e como instrumento de reequilibrio territorial.

En Lugo financia 31 solicitudes individuais doutros tantos concellos e dúas iniciativas conxuntas: A agrupación de concellos da comarca de Quiroga, cun proxecto para sinalizar o territorio do xeoparque Montañas do Courel -recentemente declarado xeoparque mundial pola Unesco-, e a agrupación de Becerreá, As Nogais, Baralla e O Corgo para sinalizar a Vía Küning.

Balseiro sinalou que estes proxectos suman un investimento mobilizado de 1,2 millóns de euros, dos que a Xunta achega algo máis do 65%. Polo que respecta á distribución territorial, a maior parte dos proxectos desenvolveranse no sur da provincia (11 proxectos), seguido da Mariña (con 8).

Esta liña de axudas ampara medidas de rehabilitación ou restauración de construcións, elementos de interese etnográfico ou da arquitectura tradicional, para a súa dedicación a usos turísticos distintos do aloxamento de persoas. Tamén o embelecemento dos accesos e do contorno, iluminación ornamental, recuperación e creación de miradoiros ou rutas, adecuación de aparcamentos, soterramento de contedores, eliminación de cableado aéreo e antenas de comunicacións, e eliminación de barreiras de calquera tipo que dificulten o acceso de persoas con discapacidade ao recurso turístico e á información explicativa. 

Dejar una respuesta

Please enter your comment!
Nombre