Inicio Galicia A Xunta adxudica a redacción do proxecto para urbanizar o ámbito de...

A Xunta adxudica a redacción do proxecto para urbanizar o ámbito de San Paio de Navia onde se construirán 1.600 vivendas protexidas

0

O prazo de execución será de seis meses e medio e o custo ascende a 211.155,89€

A Xunta de Galicia acaba de adxudicar a redacción do proxecto de urbanización do ámbito de San Paio de Navia, en Vigo, no que está prevista a construción de 1.600 novas vivendas protexidas. Cun prazo de execución de seis meses e medio, o contrato foi adxudicado o pasado 30 de xuño á empresa PROYFE SL por un importe de 211.155,89 euros e o seu obxectivo é planificar as obras de urbanización dos 265.000 metros cadrados do ámbito una vez completada a súa ampliación.

Así o explicou esta mañá en Vigo a conselleira de Medio Ambiente, Territorio e Vivenda, Ángeles Vázquez, quen mantivo unha reunión cos responsables da empresa adxudicataria e co director do Instituto Galego da Vivenda e Solo (IGVS), Heriberto García, para analizar tecnicamente os próximos pasos a seguir co fin de posibilitar a construción de máis vivendas protexidas en Vigo, a cidade galega que concentra a maior demanda de toda Galicia.

En xaneiro de 2018 o Goberno local vigués aprobou inicialmente a modificación do plan parcial de San Paio de Navia que permitiría a ampliación do solo residencial neste ámbito por parte da Xunta. Sen embargo, como lembrou Vázquez Mejuto, case dous anos e medio despois esta modificación aínda non foi ratificada de forma definitiva polo Concello, un paso imprescindible para culminar a ampliación do solo residencial en San Paio de Navia e deixalo en condicións de executar as 1.600 novas vivendas proxectadas.

Actualmente a Xunta, a través do IGVS, é propietaria de arredor de 130.000 metros cadrados en Navia, o que supón case o 50% do ámbito. Tras a aprobación inicial da modificación do Plan Parcial, realizouse unha oferta pública de permuta de solo por edificabilidade o que se traduciu en acordos con varios propietarios para a adquisición doutros 42.000 metros cadrados.

O atraso do Concello na aprobación do Plan Parcial, como explicou a conselleira, obrigou á Xunta a renegociar a vixencia destes acordos, que se renovaron este ano por outros seis meses máis co obxectivo de que nese tempo o Goberno local complete a tramitación e se poidan asinar as escrituras das permutas.

Unha vez estea aprobado definitivamente o plan parcial e rematada a fase de permuta, poderase proceder á expropiación dos terreos do primeiro polígono de San Paio de Navia que non foran adquiridos anteriormente. Para esta actuación a Xunta ten reservados nos orzamentos de 2020 seis millóns de euros, que permitirán comprar o solo restante previsto e avanzar na urbanización dos 265.000 m2 de todo o ámbito.

Dejar una respuesta

Please enter your comment!
Nombre