Inicio Galicia A Xunta achega a cinco concellos lugueses servizos móbiles gratuítos de oftalmoloxía,...

A Xunta achega a cinco concellos lugueses servizos móbiles gratuítos de oftalmoloxía, podoloxía e apoio ás persoas maiores

0

O delegado territorial de Lugo, José Manuel Balseiro, explicou que unha unidade móbil desprazarase polos concellos das Nogais, Cervantes, Portomarín, Abadín e O Valadouro, con estadías de cinco días en cada municipio

A Consellería de Política Social achega a cinco concellos da provincia de Lugo a nova rede de apoio ás persoas maiores que residen en contornas rurais denominada RedMay, que lles facilitará aos maiores de 55 anos destes municipios o acceso gratuíto a servizos de optimetría, podoloxía e apoio persoal sen ter que desprazarse das súas parroquias.

O delegado territorial da Xunta, José Manuel Balseiro, explicou que os servizos se prestan en unidades móbiles que irán rotando polos diferentes concellos, con estadías de cinco días en cada un deles.

Así, está previsto que na provincia de Lugo estean nas Nogais -do 30 de setembro ao 4 de outubro-; Cervantes -7 a 11 de outubro-; Portomarín -14 a 18 de outubro-; Abadín -21 a 25 de outubro- e O Valadouro -4 a 8 de novembro-.

A unidade móbil ofrece diferentes recursos e, ademais dos servizos ópticos e de podoloxía, os usuarios tamén poderán solicitar asesoramento sobre servizos esenciais cotiáns, como información relacionada coa etiquetaxe dos alimentos ou cos contratos e facturas de subministracións domésticas -auga, electricidade, etc.-.

Balseiro destacou que esta iniciativa, apoiada pola Unión Europea, forma parte das accións impulsadas pola Xunta co obxectivo de achegar aos concellos rurais servizos sociais e asistenciais de proximidade dirixidos ás persoas maiores, “para facilitar que teñan acceso a eles sen necesidade de trasladarse fóra da súa localidade ou do seu entorno máis inmediato”.

O proxecto RedMay está a desenvolverse nunha vintena de concellos de Galicia e na rexión norte de Portugal e nel a Xunta ten como socios á Universidade de Vigo e á Cámara Municipal de Braga.

Dejar una respuesta

Please enter your comment!
Nombre