A responsable do departamento autonómico destacou a importancia de dar ferramentas aos mozos e mozas para que os seus negocios e ideas axuden a dinamizar a economía do municipio
A directora xeral de Xuventude, Participación e Voluntariado da Xunta de Galicia, Cecilia Vázquez Suárez, presentou hoxe o Espazo Emprende en Vilalba. Ubicado no Espazo Xove, é un coworking dinámico e polivalente para que os mozos e mozas dispoñan non só dun espazo para pór en marcha os seus negocios e ideas senón tamén de medios, asesoramento e formación.
Con esta iniciativa, a Consellería de Política Social pretende apoiar á xuventude no inicio dos seus proxectos empresariais nos aspectos claves para a súa futura viabilidade, como son as fórmulas para a constitución das empresas, o acceso ao financiamento ou a mercadotecnia, pero tamén no seu desenvolvemento e crecemento xa que un equipo de profesionais os acompañarán a través dun seguimento continuado e de accións formativas adaptadas, titorización e coaching persoal. Os interesados en acudir á formación, que comezará o vindeiro día 20, xa se poden inscribir a partir de hoxe e ata o día anterior ao inicio da mesma na páxina web da Dirección Xeral de Xuventude, Participación e Voluntariado.
Cecilia Vázquez animou aos mozos e mozas de Vilalba a utilizar este espazo e as ferramentas a súa disposición. “Queremos que sexa un lugar de encontro, de coñecemento, de información e de creación de inercias e ideas e tamén de formación en habilidades, co obxectivo de que a mocidade se converta en protagonista e motor da dinamización económica de Vilalba e a súa contorna”, sostivo.
A responsable do departamento autonómico tamén destacou entre as actuacións que se porán en marcha para axudar aos emprendedores novos os encontros sectoriais co fin de crear unha dinámica de diálogo e coñecemento tanto entre a propia xuventude como cos axentes económicos do territorio. “Estas relacións estableceranse coas empresas galegas pero tamén coas lusas para reforzar o achegamento dos mozos e mozas á realidade destes dous tecidos empresariais e que poidan valorizar os seus recursos e potencialidades”, sinalou.
Xunto co centro de Vilalba, Galicia contará cunha rede de Espazos Emprendedores, emprazados en Carballo, Curtis, Noia, Pontedeume, Ourense, Chantada, Carballo, Viveiro, Lalín, Tui e Vilagarcía de Arousa, aínda que esta rede alcanzará tamén o norte de Portugal a través da Oficina transfronteiriza de información xuvenil Galicia – Norte de Portugal sita en Verín e os centros de atención cos que conta o Instituto Portugués do Deporte e da Xuventude e a Federación Nacional de Asociacións Xuvenís Portuguesas en Minho- Lima, Cádavo, Ave, Grande Porto, Támega e Alto Tras os Montes.
Os Espazos Emprende enmárcanse no proxecto LIDERA, Catalizador de oportunidades de emprego e emprendemento xove transfronteirizo (acrónimo LIDERA), que forma parte da actividade Crece para impulsar o traballo xuvenil en rede. Este proxecto foi aprobado ao abeiro do programa Interreg V A España Portugal 2014-2020 (POCTEP) e conta cun orzamento de 1.428.692, 93 euros cunha financiación dun 75 % de fondos Feder e unha duración de catro anos (2016-2019).
Son socios do proxecto: a Dirección Xeral de Xuventude, Participación e Voluntariado, a Fundación Galicia Europa, a Cámara Oficial de Comercio, Industria, Servicios e Navegación de Santiago de Compostela, a Asociación Comercial de Emprendedores de Galicia (Ascega), o Instituto Português do Desporto e da Juventude (IPDJ), a Federación Nacional de Asociaciones Juveniles Portuguesas (FNAJ) e a Comunidade Intermunicipal do Ave.
- Te recomendamos -
