O conselleiro Román Rodríguez e mais a alcaldesa, María Ramallo, asinaron o convenio para levar a cabo as obras
A Consellería de Cultura, Educación e Ordenación Universitaria destinará un total de 50.000 euros á remodelación e dotación de equipamento da biblioteca municipal de Marín, segundo se recolle no convenio de colaboración que asinaron esta mañá o conselleiro de Cultura, Educación e Ordenación Universitaria, Román Rodríguez, e a alcaldesa de Marín, María Ramallo.
Ao abeiro deste convenio, o departamento de Cultura da Xunta de Galicia asumirá o custe da remodelación do espazo interior desta infraestrutura así como a dotación de equipamento por un importe de 50.000 euros, sobre os 60.000 de custo total da obra.
Deste xeito, a colaboración institucional -neste caso entre a Consellería e o Concello de Marín- permite garantir unhas infraestruturas de carácter sociocultural en condicións óptimas ao servicio da cidadanía e, de forma xeral, asegurar o acceso á cultura en igualdade de condicións para todos.
Esta actuación enmárcase na liña de actuacións impulsadas pola Consellería, a través da Secretaría Xeral de Cultura, para a mellora das instalacións bibliotecarias de Galicia e, en xeral, dos centros que levan a cabo unha programación cultural estable en todo o territorio, ben a través de convenios específicos -como é o caso de Marín- ou a través da liña anual de axudas para a adquisición de equipamento e mellora das instalacións destinadas á programación de actividades culturais.
Precisamente este ano, con cargo a esta liña de axudas para equipamentos culturais dotada con 500.000 euros, resultaron beneficiados un total de 52 concellos, unha agrupación municipal e dúas entidades públicasO departamento de Cultura considera prioritaria a mellora das condicións de equipamento e dotacións técnicas dos espazos das corporacións locais para que poidan abrir as súas propostas culturais a novos campos, adaptándoas ás necesidades que require o desenvolvemento dunha oferta estable, diversa e de calidade.
- Te recomendamos -
