Inicio Asturias Mensaxe del Presidente del Principáu d'Asturies, Adrián Barbón

Mensaxe del Presidente del Principáu d'Asturies, Adrián Barbón

0

Día d’Asturies

Asturianos y asturianes Esta ye la mio primer intervención nel Día d’Asturies como Presidente del Principáu, lo que supón un honor inmensu y una gran responsabilidá, y quiero que les mios primeres palabres seyan pa pensar en quien nun tán, nes persones que se vieron forciaes a colar fuera de la nuestra tierra pa trabayar y facer la so vida. Quiero por que les primeres palabres d’esti mensaxe seyan un recuerdu pa toes elles, les que quiciabes vivan con más intensidá esti ocho de setiembre. Sabéi que nun vos escaecemos, que güei, más que nunca, queremos tar al vuestru llau. Como tamién queremos tar al llau de les que busquen empléu, de les víctimes de les agresiones sexuales o la violencia machista, de los homes y muyeres que nun tienen recursos, de quien precisen de la nuestra atención y ayuda lo mesmo que de les persones mayores que viven en soledá. Esa ye una de les razones principales de ser del Gobiernu del Principáu: ayudar a crear una Asturies más igual y más llibre, más xusta y solidaria. Entendéi qu’aproveche la mio intervención pa compartir los mios planes y esperances, la ilusión d’una xeneración política nueva que llega cola gana d’esterrar el pesimismu y recuperar l’arguyu de pertenencia. Una xeneración que ye sabedora de les dificultaes, que sabe cuánto-y debe a los sos antecesores, que va ser siempre tributaria del so heriedu, pero que s’atreve a imaxinar un país nuevu. Non solo pensamos qu’Asturies tien futuru, sostenemos la osadía de creyer que moldialo ta nes nuestres manos. Convídovos a abrir xuntos les ventanes a esa nueva Asturies que tenemos qu’afalar pa que cuando les xeneraciones vinientes, fíes y nietos del güei, vuelvan la vista p’atrás nun atopen los restos d’una sociedá postrada, sinón l’alcordanza viva de quien supieron asumir el desafíu de construyir el so propiu porvenir. Güei ye una xornada pa la ilusión, pa reconocer la nuestra identidá y sentinos parte d’una tierra que suma sieglos d’historia. Güei nun ye una mañana pa escaecer el pasáu, pero tampoco pa quedar prendíos de la señaldá, como un día cargáu de ñebles que nun son quien a allumar, envueltu nun mal suañu que nun nos dexa despertar y incorporanos. Dicho cola guapura de la nuestra llingua, güei tenemos que nos atrever col futuru. Convídovos porque’l futuru nun conoz amu, porque ye de toes y toos quien decidamos encaralu, porque superar los problemes ye una xera na qu’ha implicase la sociedá asturiana. Les fronteres nueves que tenemos qu’algamar llámense empléu de calidá, una industria competitiva que vaiga de la mano de la innovación y la ciencia como grandes aliaes, el refuerzu de los servicios públicos, la igualdá y la reconocencia de la diversidá y encarar de forma decidida’l retu demográficu. Nin una sola d’elles pue cruciase en solitario, ensin cuntar col emburrie colectivu d’una Asturies dinámica, activa. Esto nun va de líderes, sinón d’una sociedá en marcha. Esta invitación ye una ufierta abierta de diálogu. Sé que les palabres tamién se gasten, estrópiense col usu, trayíes y llevaes con despreciu al so significáu, pero tenéi seguro qu’esta apelación a la negociación y l’entendimientu ta enllena de conteníu. Sé tamién que tamos nel principiu d’una llexislatura, con cuatro años decisivos pa una industria que va tener que mirar de frente a la transición ecolóxica; con una reforma del financiamientu autonómicu onde se decide el ser o nun ser de la solidaridá ente territorios; que tamos énte’l mandatu nel que tienen qu’acabase les grandes comunicaciones, como la puesta en marcha de l’alta velocidá ferroviaria; que dientro poco, esti mesmu añu, hemos encarar un pactu social nuevu que concite la cooperación de sindicatos y empresarios, amás de la ellaboración d’unos presupuestos que nos dexen poner hasta l’últimu euru disponible a trabayar pola meyor Asturies. Con toos esos retos a la vista, cómo nun voi exercer la responsabilidá de llamar sincera, abierta y humildemente al alcuerdu. Alcuerdu pal futuru, una vez más. Diálogu pa trabayar xuntos nesi propósitu d’edificar mano a mano, costazu con costazu, la nueva Asturies. Tenemos que poner ilusión nesos oxetivos, tenemos que celebrar xuntos esa gran ambición nesti Día d’Asturies. Un abrazu a tolos que, dientro y fuera de les nuestres fronteres, lleven siempre nel corazón el nome d’Asturies. ¡Feliz ocho de setiembre!

Dejar una respuesta

Please enter your comment!
Nombre