Inicio Asturias La verdina d’Asturies va poder etiquetase dende anguaño con marca de garantía

La verdina d’Asturies va poder etiquetase dende anguaño con marca de garantía

0

La conseyera de Desenvolvimientu Rural afirma nel Salón de Gourmets qu’esta feria ye la que meyor s’afái a la producción agroalimentaria del Principáu

La Conseyería de Desenvolvimientu Rural y Recursos Naturales va presentar esta selmana nel Salón de Gourmets les marques de garantía Verdina Asturiana y Vacunu Mayor Asturiano, amás de la iniciativa d’una nueva Indicación Xeográfica Protexida (IXP) Miel d’Asturies, la sidra brut dientro de la Denominación d’Orixe (DOP) Sidra d’Asturies y la campaña pa impulsar la candidatura de la cultura sidrera a patrimoniu inmaterial de la humanidá, según manifestó güei la titular del departamentu, María Jesús Álvarez. Álvarez, qu’asistió en Madrid a la inauguración d’esta feria internacional d’alimentación y bébora, anunció qu’anguaño va poder etiquetase esta llegume col sellu Verdina d’Asturies, una marca de garantía que va xestionar el conseyu regulador de la faba, como primer pasu pa incorporala a la Indicación Xeográfica Protexida (IXP) Faba d’Asturies. “La verdina del Principáu, que medra n’aceptación y en producción, va poder etiquetase yá anguaño cola marca de garantía que dea seguranza al consumidor cuando la merque”, amestó. La conseyera refirióse, amás, al indicativu Vacunu Mayor Asturiano, que tien por finalidá poner en valor la carne fresco procedente de los añoyos, novielles, vaques, cebones y gües de les principales races autóctones: Asturiana de los Valles y Asturiana del Monte. Con esta marca quier promovese la comercialización y acreitar la garantía que s’ufierta a los consumidores tocantes a la calidá y l’orixe de los productos. Otra manera, nel estand institucional del Principáu nel certame va difundise tamién el logotipu pa promocionar la candidatura de la cultura sidrera a patrimoniu inmaterial de la humanidá pola UNESCO, presentáu la selmana pasada cola mira de sumar adhesiones al proyectu, y que se va empezar a ver “de forma inmediata nes botelles de sidra”, según señaló Álvarez. “El Salón de Gourmets ye l’alcuentru internacional de productores d’alimentos que meyor s’afái a los productos agroalimentarios d’Asturies, que la so seña d’identidá ye la calidá, la naturalidá y l’autenticidá, axetivos que s’identifiquen col productu gourmet”, señaló la titular de Desenvolvimientu Rural. Amás, resaltó la importancia de la marca Alimentos del Paraísu Natural, qu’ampara les producciones asturianes pequeñes y grandes baxo un lema común coles mires d’entrar nos mercaos nacionales y internacionales de forma compartida. “Queremos que’l nuestru estand nel Salón de Gourmets seya un auténticu zocu de promoción de los meyores productos d’Asturies, como la carne, lo lácteo, el pescáu, el mariscu, la sidra, el vinu, les conserves, les llegumes o’l miel, alimentos que tienen valor pola so naturalidá, porque son tradicionales y singulares, munchos d’ellos con sellos de calidá como la indicación xeográfica o la denominación d’orixe protexida, y toos ellos amparables na marca Alimentos del Paraísu Natural”, indicó Álvarez. Un total de 26 empreses asturianes tán presentes nesta edición de la feria pa establecer contactos nacionales y internacionales.

Dejar una respuesta

Please enter your comment!
Nombre